المسرحة الكوميدية
كتبها سعد موسى مهيوس
البيضاء ،ليبيا 2018م.
محلات ربيع وعجاج للمواد المنزلية
والدجاج
يوجد لدينا كروت نت وافراح وموز
وصبابيط
بجانب الخشبة الايمن محلات ،، اللافتة
( حلاق الحول لقصات العصر الحديث )
محل بجانبه ( المرعوش وشركاؤه لصيانة الإلكترونات الدقيقة )
يسار
الخشبة ( بن خياط وابناؤه، للبقوليات )
( بو
الحفيان ، الاحذية و مواد البناء ) ،، (
بن كسبر للأقمشة )
( المكان كروسه ابضاعة والدكان اصغير )
(بدون
صوت تتحرك شفتاة ويدا عجاج يخطب ويشير له ربيع بكيس الخبز )
ربيع : انت من بدري تحكي والزبائن كلهم خذو خبزتهم وعدو ، هاك الباقي
عجاج ( ينظر لكيس الخبز يترك الباقي ، يقبل رغيف الخبز، ويمرر يدة في عبر
كوع ربيع ممسكين بيديهم كما اطفال فرحين ويتقفازان ويغادران فرحين بانجاز الخبز مع موسيقى تتماشي مع الحاله)
( ثم
تتراقص اضواء مختلفة وتتدفق موسيقى )
(مشهدية
مع موسيقى ما بين الترقب والمُضحكة كما الموسيقى المصاحبة للتوم جيري )يتسلل كل من عجاج
ويراقب ربيع كما ان ربيع هو الاخر يتسلل "يسلس" ويراقب عجاج ،)
عجاج( يدير روحة منطمر وراء شيشة
ببسي ،)
ربيع ( داير روحه يختل في عجاج
وما يدير في شيء ف الدكان يحط اديه في اجيوبة ويصفر،
عجاج ( يلتفت للمكنسة وياخذها
كما بندقية ويتمترس خلف سطل كعك وتبرق اضواء ويصدر هو صوت اطلاق صلي طرررررط طرررط
ثم ياكل من الكعك كعكة واحدة
ربيع (يتمترس خلف أكور نايلو في
كيس،، وياخذ حكية ببسي وكما قنبلة رمانة ينزع فتيلها "يحله" ويومئ
برميها لكنه ياخذ منها جغمة ويدعي رميها وينبطح ، وبينهما قلالين المية يزحفان ليلتقوا
وجها لوجه وفجأة يسلموا علي بعضهم وكأنهم )
عجاج: هوا نت كيف صار ،اسمحلي
ربيع: اووو ، كيف ياراجل انت
حبيي،(ويحبوا علي روس بعضهم )(ثم تتدفق موسيقى نشرة اخبار وتتراقص اضواء ليذهب كل
منهم الي مكانه لينطلق الحوار )
ربيع ـ ( يصلح في تلفزيون المحل يجرب الروموت يخبط التلفزيون يشوف خيط
الصتالايت
ويصتدم
بربيع ويسلموا على بعظهم )
(حـوار )
ربيع : اااا عجاج ؟ انت امتى جيت ما فطنتلك بكل ، باقي نظام يخش
القش وما يخبرش
خلي
الحكاكي لمنظمات ع النظام لولي؟
عجاج: (رافعا يديا محتجا ) :لا
يا ربيع يا خوي، النظام لولي موش اكويس
ربيع: ياراجل النظام اكويس(ويرتب
الحكاكيي ع الطرمات)
عجاج : لا ، لنقانا يسقط هك يتقلبط (يسقط حكية طمام)
(يتحول
ربيع مع يسقط وينقلب عجاج ضد يقسط)
ربيع : الصلاحية ، اهي ساقطة يسقط (ممسكة بعلبة حليب)
عجاج: لا النظام تمام المعلبات
برواحن والمعجنات ع اليمين والمكسرات ع اليسار، مواد التنضيف هنا ، ادوات التنحيف
غادي، لا النظام ،ماعندك ما تقول فيه
ربيع: وين ؟ هذا نظام ؟ اهي المستكة شن جيبها الكروت النت ؟
عجاج : كلا مطيخ فارغ
ربيع: صدق اللي قال إتـعـانـدن
لارياح ولا تسأل طبيب
عجاج (يدور حول الطاولة ثم يتقدم الي مقدمة الخشبة) : باهي
ياربيع مرة اتكنس واتقولي النظافة اكويسه
واتخلي المحل كـل عجاج ،ونقولك قطعتنا
بالعجاج ؟ اتقولي اهو، كلا عجاج
ربيع ( يتجه محدثا نفسه هو الاخر يتقدم يمين الخشبة )
ربيع : ماشي ياعجاج خسرتنا ف
الدكان، انقولك العيل خذا شيشة مشروب ابخمسة ومدلك عشرة اترد للعيل حق سبعة اجنيه
ارقاق حديد وحلوة وبشكوط ،وتقولي كلهن
اقروش خلي العويلا يقرشو
ربيع (يلتفت ليعود للحديث مع عجاج ،)
ربيع: ااا خوي عجاج اا اتوصي علي شي للدكان ؟ ااقصدي للصمول مول اللي شكلا
حيبقى مول كبــير مدام ناوياك متفاهمين؟
عجاج : ا اريت ياربيع راه الزبائن يسألوا ديما واجد هلبا ، يسألوا ع البلاك
وشيش المية خصوصا المستوردة ، عليهن طلب
موش غادي ، قصدي موش داعي
ربيع : موش عادي
عجاج : ايواه مـــــــــوش بكول
ربيع: تغير شن جاب البلاك ؟نحن
مواد غذائية منزليه مول امويل اصغير
عجاج : اهو زبائن يبوا يبنوا ، يبو
يعجنوا ، قالو ابلاك معلب مستورد يبو اليسوه بالكريمة والشكولاطة ويـبيـعو عـليه ويكلوه
ربيع : ياساتر
عجاج : ااا، فيه رجالة تاكل الزلط ،في واحدين جواعا ، يحدرو ف الكسكو بخبزة الفردة بجنيهين راهو
ربيع : ثاريتك مانكش ساهل ياعجاج ،
مخ تجاري ،
عجاج : هـــــــــه، سلم الصتلايت والنت حتى انا نعرف البجنش،
ربيع : بج نش ؟ شنو بج نش؟
عجاج : البج ،جايي م البج يعني بجد بجد ييـــه، والنش (ينظر للجمهور ):جايي من النش اللي المبجد
واللي ينش توا أهم يبرمو ف بازار وسوق ايامك يا برررررررم برررررم
ربيع : هيا باي ،توا
انجيك نطلقك بعدين انا مشي ياعجاج
عجاج (يرتب ف العلب ) : مربوحه
رد بالك م السيارات ، والا ارجى ؟
عجاج: ردبالك م الكراهب
ربيع : كيف ما هي هي ؟
عجاج: لا يتهيالي الكراهب اخطر م السيارات
ربيع ( يغادر ثم يكرس ويسترق النظر
ويراقب عجاج )
عجاج ( يرتب علب المحل )
ربيع (تنكر في دور زبون لبس نظارة
سودا وطاقية كاب ويغير صوته )
ربيع : (بصوت ابح ) اا مرحبا يا بوصاحب ،
عجاج: ، مرحب تفضل ؟
الزبون : بيش المبوخة ؟
عجاج : ااا بجنيهين ونص ،، اا ، اقول بجنيهين
الزبون : ااا وعطينا ااا حكية حمص ، كداش الحمص ؟
عجاج : ااا ابثلاثه ونص قول
ابثلاثة
الزبون : وكداش مشورب حوكه ،؟
عجاج : ااا بجنيهين قول ابخمسين قرش
الزبون: ( يحرقة السعر الاخير فيصرخ
،) : وكداش العسل السدرة ؟
عجاج: النص كيلوا اربعين ، قول ابعشرين
الزبون ( يخلص البضاعة :كم احسابك
عجاج (يحسب في ورقة ) : اا 2ونص +3ونص قول ثلاثة +عشرين قول
عشرة +خمسين قرش قول عشرين قرش والا مافيش
داعي ااا احسابك عشرين ونص قول عشرين الا
ربع
الزبون :،هاك عشرين وما اتردش الربع ، تريح
عجاج ( يعد الفلوس ويحك راسة ويعد مرة اخرى
(ويغادر
الزبون وتتراقص اضواء مع انتقال مشهدية
قدوم ربيع عائدا للدكان
عجاج (منهك يحسب ويحط ف الحكاكي
ويقسم الفلوس الى جانب والحكاكي الى جانب ويحاول ان يوازن بين ثـقـل القروش الحديد
وحكية فول وهكذا )
(يأتي
ربيع ينظر لعجاج وينظر للجمهور مندهشا بما
يفعل عجاج ؟ )
ربيع : مرحبا عجاج اا؟ ما طولتش عليك أأأأ فيش تحسب يا انش نشششششش تايون،
عجاج : ااا اهو الواحد يحسبها يجرد نهاية العام ،مرات فيه فروقات في موازنة
الاسعار ، انا انششش تايون ؟ ،كبر مقدارك يا ربيع حتى انت في الدكان هنا كيف جاللو والا
نيـوتن ، الحكية اللي اطيح اتقول ليش طاحت ؟
ربيع : ( يفاجأ لثقافة عجاج وينظر
يمينا ويسارا ) :غريبة ؟ فعلا نسمع كلامك اصدقك ،اللي م فرس بوك لا توميلا)
ربيع : ريت يا عجاج نحنا في شركتنا
هذي في الدكان ألها لفترة بدت فيها ، أأأأأأأ ومافيها أأأأأأأ و،صدق اللي قال الرزق
السايب ما يجيبنا مراسيل (يقولها هكذا ووجهة نحو الصالة وبطريقة غير متاكد
ولا يهتم بصحة المثل )
عجاج : تبي اتقول الحساب فيه خللبطا ؟ صدق اللي قال خبزة الشريك من فم البيت يبان
ربيع : ااا ياراجل ااااا خلينا
اترافقو رفقة السلك ونتحاسبوا اتدور
الأبره رهو
(ويدور
حول عجاج )
عجاج : شكلك تبرم علي ومع عقارب الساعة (مشيرة لدوران بأصبعه)
ربيع : ريت هذا موش كراس الحساب ؟
عجاج: ايواء
ربيع: شوف هذين اهن هذين موش خمس مية وميتين ؟ موش ؟
عجاج: ااا؟ (يحاول لكن مش فاهم وداير روحة فاهم )
ربيع : هذين موش خمسمية وميتين
؟موش ولا موش موش ؟
عجاج : ااا موش
ربيع: خلاص لما انقصو منهن ربع الميتين اهن هذين ميتين البضاعة اللي الشهر
جبنها لمافات قبل عامن اول موش جبنا جبنا وتن موش والا موش موش ؟
عجاج : ااا ممممم
ربيع : شكـلك عججت ياعجاج انسيت ؟
عجاج : شكلك ربعت ياربيع انت تبرم
في لما تحكيلي يتهايلي قاعد ف الملاهي في
البرمات الي يبرمن نقعد انشوف فيك اتباعد واتجي وانت تضحك وانا نبي
الحمــــــــــــــام (بصوت صرخة )
ربيع: ( يبرم حول عجاج ويقول )
ربيع : انا اموقف انت اللي راسك
يبرم (ويبدا عجاج يدور حول نفسه يعني ابرما ربيع )
(فجأه
تندلع جلبة واصوات وحيط ورصاص في الشارع )
ربيع : كيف صار ها الدعكا شنوا ؟ ااا
يطلقو في العجل ويحرقوا ف الحيط ؟
عجاج ( ينظر للبعيد بجانب باب
المحل )
عجاج: اااا عدي غادي ياولد لا لا
ما تكتبش هنا ااا(يخاف ) : باهي اكتب اكتب نحن انسكروا المحل ونحلوا
ربيع : لالالالا ماتكـتبش اااا
عجاج : لالالا احرقو الصورة
ربيع : صورة المحل ؟
عجاج : لا ،، صورة حـل حــل
(يسكرو
ويعفسوا)
(اصوات
مظاهرات ثم صوت موسيقى نشرات اخبار ثم صوت ابواق سيارت جمهور هاي هـاي فزنا عــليهم
هـاي هـاي يا فازنا عــليهم )
( يهدا الجو، يعود
رييع وعجاج متسللين للمحل ،)
عجاج : ااا غم يا ربيع فازو
برشلونة يا
ربيع : ااا بعدما تـكــت بين البرشلونيين
وبين الريالديليه واحرقو العجل ،قلت خلاص
توا الفيفا تاخذ الكورة وتفلقها واتقول كل واحد يلعب ورا قدامهم
عجاج : لكن مبارة دوليه يا تو يكلوها تو خشو فيها محترفين من برة يا
ربيع : ومبارة الرد انخليكم يالبرشة مذبحه ، توا انجيبوا من برة مدريد
محترفين امحرفين انفزوا عليكم اتنينا وصفرين صفر
عجاج : توا انشوفو اللي فيها حليب في عين امه غزال ،واكانك عابي ع الفيفا طلع
لفيفو لهيفو
ربيع ( يحاول مصالحة عجاج ويتقرب منه
)
ربيع : اا ياخوي عجاج ااا سيـبك ما
اللي صار، تعال ؟ عندي لك موضوع ، لازم
انقبل ها الراس )
عجاج : لالا ما فيش داعي
ربيع : لازم ارجا (يقبل راسة )
ربيع : كيف صار غاسل ابشامبو تايت ، ؟
عجاج : حول غادي حتى انت امليس
ابجل عجل
(يسلم
عليه ويقوله )
ربيع : ابتسم للكاميرا (زي
المصافحات السياسية )
عجاج : (فرحان بالصور صوت لقطات واضواء التصوير واشويه حركات امع التصوير)
ربيع: تعال يا عجاج انقعمزوا ونتفاهموا على شركتنا هذي في هالدكان
عجاج : انقمعزوا مش اتقعمزو
ربيع :
لا اتقمعزوا، لان الفعل ق عين ميم يأتي من (يقاطعة عجاج )
عجاج : اتقعمزو هك اعناد ، العين قبل
الميم والا الميم قبل العين؟
ربيع : ميم عين ميم را (يحاول أن يهتف ثم يستدرك الامر ويصمت مع تفاجأ )
( بحركات
على الخشبة كل منهم يتحرك الى جانب الخشبة من جهته ثم يعود وبعدين يوقعوا على ورق ويغادر ربيع يتحدث ربيع لنفسه الي جانب الخشبة الايسر )
ربيع: تو انوريك يا عجاج ما فيهاش
الا انتـنكر وانجربا شن ايدير وانا مش قاعد
( عجاج
يترتب العلب واحدة اطيح ولاخره يحطها غلط ويقعد اوازن فيهن )
عجاج : تي كيف صار ؟ شن جاب طمام حكاكي للفصوليا حكاكي ..اهو كلها حكاكي ،،
لالالالا هذي مرسوم عليها فار ( يلتف خوفا يمينا ويسار) : اا ازعما من امتى وانا انمسي فيها امع الفصوليا
, لالا الناس تقرا،، اكيد ما خذا منها حد (ثم يتذكر )
عجاج : اااا، العجوز اللي هذك
اليوم ،،،اختفت ماعش جت بلك للدكان (ينظر لخارج المحل ) عموما ما سمعتش علي امعزا في الحي هذا (ويرمي علبة السم في مكان وراء الطا رمات )
(يأتي
ربيع متنكر في دور رمانة )
عجاج: اهي هي جت (يحاول يمشط اشعر يبخ بنة يحط علي روحا ابهارات
رمانة (مشيت الدلع وحركات ) : خير ،ااا عندك مكنسة ااااا ؟
عجاج : مكنسة حرشة ؟
رمانة : الا عارفتها هذي
عجاج : مكنسة ناعمة
رمانة: مع مشية ويلحق بها عجاج) :لا عندي
عجاج : كهربائية ماعنديش لكن نصرفك
رمانة: تي لا مكنسة
عجاج : اا مكارة ولا مواخذه الباير اللي هك (خررررط ،،خرررررط ،)
رمانة : تي لا نبي مكنسة نوعية يعني
عجاج :مكنسة حك الفرش القاسية
رمانة (تتوقف ): ااا مش مكنسة اا (تحاول تجميع
الكلمة ) مك مك ؟ ااا نبي ،عندك مكرونة
عجاج (حركة دوخة يهز راسة بمعنى شن جاب المكنسة للمكرونة )
عجاج ( حيه بعدها عشرين نوع المكرونة، ريتي انتي ِشيرلي عليها قوليلي هذي
رمانة: المكرونة اطوال
عجاج : اا اسبقيتي
رمانة: لا مش اطوال واجد
عجاج (يخبط المنشف)
عجاج : قتلك ؟ انتِ اصلا متأكدا انك ماشيا للدكان، باللك ماشيا للمكان آخر ؟
رمانة : خطرها اااا انا نبي ااا ؟، ايش
طلعني ما حوش ؟
عجاج ( ياخذ زاوية الي يمين الخشبة )
عجاج : باهي اللي ما كانت ماشيا لـل ااا.......
رمانة : اسمع مش اتقول امودره غير انشوف فيك انت اخلاق والا ماعندكش روح
رياضية
عجاج : اااه اخلاق حرشه وناعمة
رمانة : ما اطوال و والا حراجيم ااااهــــه هــــه (تبي تخبط علي يد عجاج ثم تلتزم الوقار )
عجاج : كيف صار ااا تفضلي ايش تبي؟
المحل علي سحابك تعلي فــوق السحاب ،بس
ماتنطحيش السحاب ، الله ايربحك ،خلوا السحاب في حالة وانتو ما اليقتوا ما تنطحو
رمانة: انا ننطح ؟ احترم نسفك، نسف
عجاج : لا حشاك ،م الحشو العجينة !
رمانة : اا طبعا نبي مكنسه حرشة ومكرونة اسبيقا كيلوين ومشروب ببسي
عجاج : ااا عرفت بعد تاكلو تبوا اتكنسو ؟
رمانه: شن دخلك ، ااا جيب امعاك فول وكسكسو (اا سجل ف الكراس لما تنزل
السيولة ااتوا انخلص )
عجاج : حاضر( يجيب الطلبات وقبل ما يسلم )
عجاج : اا حتى نحنا انطوبر ع المصارف قالوا اقريب تنزل ،،اعـفوا ا انتعرفو علي اسمك ؟
رمانة : اا رمانة
عجاج ( ينبطح وتنبطح في جرته رمانة )
رمانة : كيف صار الله يفجع درايزك
عجاج : خليك منبطحا راهي تاخذ عشر ثواني وتنفجر
رمانه: وانا وليا عيب نقعد هكي ، نزحف لعند الحوش توا ؟ عيب عيب
عجاج : ازحفي وتدحرجي شور الدكان احسن
رمانة : اهلبن العشر ثواني شنو اللي
تبي تنفجر ؟
عجاج : الرمانة وين طبت اللي قلتي عليها ومنين طاحت علينا ؟
رمانة : أي رمانة ؟
عجاج : تي مش قلتي رمانة ما رمانة ؟ انا راني امفجع واجد وخواف ، هذك اليومات طاحت هاون في طنجرة عشا جيرنا
اسوو في الحاجر حفلة نجوت ولدهم من انفجار برويطة مفخخه
( رمانة
تقف وتنظف ملابسها )
رمانة: صبي صبي هات الشكارة
ان اسمي رمانة ، عمرك ما سمعتا ؟
عجاج: وعمري ما شفتها انا اسمعت رمانة
انبطحت ،، وباهي انتِ كنك انبطحتي
رمانة : وين نندري عليك شفتك انبطحت حتى انا في جـرتك ، هات هات الشكارة( وتمشي)
عجاج (يترقبها وينشد شتاوة املاخبطه
وبايخة "
: منا
اواصف الموجيرة ****** عقلي
ذاهب منا شيرة ،
( ثم يعو لداخل المحل ويحط الستلايت )
(ربيع
يغير ملابس رمانة ويعود للدكان )
ربيع : هيا يا سي اهو ماطولتش عليك
عدي تريح
عجاج : وين انتريح تي المغرب من بدري
اذن لنقني قلت المغرب كلا اعشا ، اهو قالك المعلق هجوم معاكس وريال 2 وبرشلونة
1،
ربيع : تستاهلو سوف تندمون جابـين لاعبين
اجانب كلهم الواحد منهم ماللي يقلبو في النتيجة
عجاج : يعني الريال اللي كلهم مداريد
، ما فيهم ولا مدراد ، هم اللي بدوا يجيبوا
في املاعبيا والهدافا امواعدينهم بالملايين
ربيع : لا هذوم من هنا لكن كانوا برة يدربو وبعدها جوا (يتحرك لينظر يمينا
ويسارا للشارع )
ربيع : قولي كنهم الجماعة امسكرين بدري ؟
عجاج : يا سيدي بعد التكه لـو ولاه
،الامور تلاخبطت وتموا يسكروا بدري
ربيع: وين امسكرين مالصبح !
عجاج : امسكرين ما الصبح ،،اقعدو اتعاندو
عل التسكير بدري وبدو اسكرو بعد العصر وبعدها بعد الظهر وبعدها يسكرو مالضحى ومن العناد
سكرو م الصبح
ربيع : اا عرفت تسكير الراس امنين جاي من تسكير الدكاكين
عجاج : اا ايش رايك اتغدا امعاي اليوم
اجلها ترويحتك توا ؟
ربيع: اا لا صوادر فاطر من بدري ،
(يغادر
عجاج وينزوي الي يمين الخشبة ويفكر بصوت مسموع )
عجاج : باهي ياربيع تو انوريك انا لازم نعرف فيش ادير في الدكان وانا مش قاعد ؟
ربيع ( يرتب الدكان ) : تي وين معلبات
الجزر ؟
ربيع (يتصل بعجاج وعجاج ، ينظر للتلفون يحاول تعليق الرد عليها ومع الالحاح
يرد على ربيع
ربيع : ياعجاج انرن عليك مرة ما اترد ومرة ادير مشغول ؟
عجاج ( ينظر التفلون ) : اا صح اهي ماكلمات
غير مشغول عليها اا غير مرود اا
ربيع : وين علب الجزر ؟ اللي عليهن صورة الأرنب ؟
(عجاج
في ثياب تفاحة بجانب الخشبة الايسر
متواريا عن ربيع )
عجاج (عبر التلفون) :ما فيش الا
حكاكي عليهن صور فار حطيتن وار الطرمات
ربيع: تي مش فار،، يارجل ، ارنب أرنب جزر معلب
عجاج : كيف صار مش سم فيرات ؟
ربيع : لامش سم فيران ، ارنب ، شعار الجزر يقوي النظر ....ااا؟
عجاج: راهن ورا العصى
اللي ورا الطرمات
ربيع : عصى ؟، ( يطلع عصى طويلة عالقة في مقدمتها جزرة ، (يستغرب يحاول أن
يأتي بالحكاكي،)
(تصل
تفاحة )
(عجاج متنكر في ثياب تفاحة متوجه للدكان )
(تاتي
تفاحة ماشيا على كعب عالي وجو )
تفاحة : خير
( ربيع
يتفرج ع المبارة )
ربيع : يلعن شكلك ،
( تفاحة
تلتف يمينا يسارا )
تفاحة: ( بدلع ) خير ؟
ربيع : ضيعها الحمار ، اطلعت فوري موش شور الباب بلكل، لعن شكل الكوو (وصمت
بمشاهدة تفا حه )
تفاحة : ااا نبو عصير فواكه عندك كوتيل ؟
ربيع : اا معليش قلتيلي كورة شنوا ؟
تفاحة: كوكتيل ، كوك تيـــــــــل
ربيع: ااا عصير ، اللي ف البـاكـوات
؟
تفاحة: تسفـتر علي يا صامط دنيء صايع تافه منحط حمار وقح قرد واطي بايخ فاشل
منقرض سيء بغل نذل خـزيه تفــــــوه
(ربيع
يتفاجأ نين يدعدع اتقول مخبوط بحاجة علي راسا !!! )
ربيع: واو يا ، صلي ، قائمة كاملة
تفاحة : ااا يوا اا نبي باكاوين لو سمحت ؟
ربيع: (ربيع يفاجأ للتـغـيير ف
الاسلوب !! )
ربيع : في كوتيل نسماوي ومحلي (ويخاف ويبدي سرعة في خدمها )
تفاحة : اا نبي اثنين واحد نمساوي
ربيع (يمشي يجري ويجيب بكوا )
تفاحة : ااا ، ولاخر نمساوي ( تاخذ الباكوا ويسير لخبطه )
تفاحة : هات الباقي(وما زالت ما اتفعت اصلا)
ربيع (يخرج من جيبة فلوس )
تفاحة (تقعد ف الدكان وربيع يعدي ثم
يعود يجري
ويقول)
ربيع : انسيت محرمتي
تفاحة : تعطيه المحرمة
ربيع: (يكتشف انها هي المرأة وليس
هو )
تفاحة: تتحسس راسها تكتشف انه هو صاحب
الدكان يعني لاخبيطا )
تفاحة : كيف صار يا صاحب اا
ربيع ( يجلس يتحسس راسة ) : في حرارة والا كيف صار؟
تفاحة :اا سجل ف الكراس ،باكوين انا جارتك هنا ، سجل علي اسمي تفاحة
(يحاول
ربيع ايجاد اكتاب الدين )
ربيع : اهو سجل الدين ،،(يكتب ) أأأ تفاحه باكوين ، ااااا تفاحة من ؟
تفاحة : بو ازعتر
ربيع : الله
تفاحة: بو ازعتر الخل
ربيع :اففففف
تفاحة: ماشي باي
(ربيع
يبدا يحوس ف الدكان يمشي يمينا ويسارا، قلق ويصفق كفييه )
(
ينزوي عجاج يسار الخشبة يخلع جلباب تفاحة ويعود للدكان )
ربيع : اا عجاج وين ياعجاج هيا
نلحقوا المصارف الدكان خلاص فلسنا مازال سبع حكاكي هريسة ما عندهم بيش يطلقوا النية ،، الناس ما لقيت ما
تاكل
عجاج : حتى انا قلت انخلصوا لاجار وانقفلو وانتلاحقو ع الحسبة ، الهريسة خليها
تنتها مدتها
ودهمها
للقطط السمان
ربيع: ليش ؟ حرام عليك ؟ ايش دايراتلك القطيطيسات ،
عجاج: لا،، الهريسة لما تنتها مدتها ماعاش تبقى حارة
ربيع : هــــــه ؟
عجاج : تبقى حلوة سُــــكــر
ربيع : ما ضنيي الا اتسبب تجويع
للقطيطيسات
عجاج : خليهن ايحدرن سندوشات فيران بالهريسه
ربيع :قطاطس وفيران صدق اللي قال
حلم القطاطيس كل مصارف
عجاج: خطرها المصارف هيا اشقا بروحا
مالك ومال حلو سكر ،عيش الواقع ، الواقع
مررررر
ربيع : هذا عليش يبو يركبولكم محطة تحليه
(تتراقص
اضواء واصوات جلبة واضواء متنوعة ويتحول الدكان الي مصرف ،،المشهد ف لمصرف ،،، المصرف " دمى " في صف بنابل واللي طايحا في ثوب مرأة واللي فرملة
وشايب ويقف في الطابور عجاج ويأتي ربيع
يـبـي يزرق )
عجاح : كنا يطول بللكل (الصراف
ربيع يخض في شاشة الكومبيوتر يحاول تسريعها )
عجاج : (يتحدث للدمى ) : طول بلكل ؟ ما الساعة تسعة اول امس لعند
اليوم ، ومازال الليلة ثـالـث ليلة ، خلاص يفكو الخيام
ربيع (،يحاول يبخ تنظيف
وامية في الكومبيوتر )
عجاج : طــول بلكل
ربيع: ( يطلع مجلة يقر فيها ) :
هذا صراف والا حلاق يا ؟
ربيع : ( يعطي الدميه افلوس ارقاق اجنيهات وارباع
عجاج : ( يزيح الدمية :خلاص كملت السيولة
( يتحول مكان الصراف دمية ويأتي ربيع كزبون يبي
يزرق قدام عجاج )
عجاج : تي وين يا رد ؟ الطابور ، من
اول ليلة ونحن هنا من اول ما جانا العلم سبقنا هنا
ربيع : ،اهي حطيت ولاعة قبلك؟ ، حتى انشد هذوم ؟
عجاج : ولاعة ؟ ، يحطو فيها في دور
الخبزة ،، هنا اتحط روحك يزرقو قدماك، وانت
قدام نفسك ما يحترموهش بلكل ، مرة واحد حط باتا وعدا ، و طولوا وهم ايقولو هالبات لمن ؟ هذا
المن ؟ مارد حد ، اعزقـوه هنك البات ولاعتين شيشة امية
ربيع: كيف صار،خلاص ما فيش اخلاق ؟
عجاج : ماهو تطلع مش بات حد
ربيع : كيف صار؟
عجاج: ( طلع حاط بمبلينا وملبسها دبش المعاناة وكندرة الاحزان )
ربيع ( يزرق )
عجاج: رد لاورا اتلاهي في وتزرق ؟
ربيع: كنهم هذوم ماتكلموش ؟
عجاج: هذين بنابل اهن شـوف ؟
ربيع : ما تخرجش ع النص ؟!
عجاج: اهي مكتوبة ف النص هك
،ومكتوب في النص اني نرقعك ونعطيك طريحة غير خش فيها المخرج وشطبها
ربيع : باهي هاك صك
عجاج : انا اتقولي صك يا حصان ؟ انت الي صك وبرطع غادي
(عركة
اضواء تتراقص ثم يتحول ربيع الي صراف ويتحدث مع عجاج )
عجاج: يارجل ايش صار ؟
ربيع : (يشتغل ع الكومبيوتر ويحط
في جيبا القروش ارقاق حديد يخربشن)
عجاج : ياعمي الصراف لنا ثلاثة أليالي
؟
ربيع : مش مني من المنظومة (ويصرخ ويخرج الي مواجة الجمهور )
ربيع: مش مني من المنظومة ،، مش مني
م المنظومة (ويبكي وينزل ركبة ونصف مرددا
مش مني من المنظومة ويضع يدية على وجه باكيا محطما ):م المنظومة المنظومة
عجاج (يتعاطف معه )
عجاج: ياراجل طلقها ، اللي جابنها
ايجيـبـن غيرها
ربيع ( يبكي) : ما نقدرش )
عجاج (يعطيه مناديل ) : امسح ادموعك ،ادموعك راك تمسح خشمك
الله يكرهك
ربيع (ياخذ المنديل وينظر يميناا
ويسارا مبتسما ابتسامة ماكر بمعني عدا عليهم الطرح وينهض فتتبعثر منه القروش
الحديد )
عجاج ( ياخذ ربيع الي جانب الخشة يتفاهم امعاه ع الفلوس هذين )
عجاج : وين يا اا ؟ انسيت صاحبك ؟ ،
لعب كم هذين ؟ ، راني درتلك جوا
فتحت اللعب ع اليمين وخليتك تنزل م اليسار واتسجل قـــــول
ربيع ( بلهجة ) : ياودي باهي باهي اوسكت اوسكت يسمعوك ؟(ويتلفت هل من احد يرانا )
ربيع: تي انت ما درت شي راه ،جت
امعاك بالصدفة ،
عجاج : لعب لعب انا أوال من دار
هالزحمة
ربيع: (باللهجه ) وانا كملت امعاك
الجو، أحني واحد ، واحد راهو
عجاج : اهن حصلت هذين (كيس اصغير فيه ارقاق يخربشن)
ربيع ( يطلع اكياس ويتكلم باللهجة ) : اتعالا نحسبوهالاك
ربيع : هذين موش ميتين وخمسمية وصفرين ؟
عجاج ( يحك راسة يهزة محاولة فهم
شيء،مش فاهم لكن مظطر ايقول تمام وخلاص :
تمام
ربيع: اهو خوذ هذين يبقى عندي مية (بلهجة ) واني هادي الحساب ميه (ياخذ المية
اللي عند عجاج ويردلا الكيس فاضي وبعدين يحطلا اقروش وبعدين يعطيه كيس القروش
الثاني )
ربيع: امسك هذين (كيس فاضي ) :
واني ليا هادوم
عجاج ( يلتفت ماهو عارف شي )
ربيع : حط حط في جيبك فيسع و( ويقوم ربيع بادخال يده في جيب عجاج وكما الساحر يقول لعجاج تراه يدك
ابسط كفك شوف اهم في يدي ويريه جنية حديد ثم يرميه لاعلى ويمسكه ويخبط يد عجاج على
اساس حطله الفوس في يدا )
عجاج : (يضحك كالاهبل (أه هـاي أهء أهء ويمش خشمة بكمة )
ربيع: وتو شن رايك بدل ما نقعدو سلبيين انغيرو المشهد ااا ،انا نبي
انرشح في الانتخابات بعدما ها القريشات ، اهو نخدموا البلاد عاد
عجاج: وحتى انا انرشح ،، هك اعناد
ربيع : تعال (يتجه لمقدمة الخشبة )
ربيع : كم امعاك راهو الدعاية
الانتخابية اتكلف ؟
عجاج: يطلع جنية واحد
ربيع: كيف ؟ حلك ودرتهم ؟ فيش صرفتهم ؟
عجاج : الصندوق ما عليك فيه انا محظوظ ف الصناديق مرة طحت في صندوق كبـير وفتحته
القيتا امعبا
ربيع: (ياخذ عجاج على جنب ) : امعبا
شنو ؟ (للاُعبا سايل )
عجاج: امعبا دولارات
ربيع: شنو ؟!
عجاج : انا ف الاول نحسبهن بنك الحظ ، عمري ماشفتهن من قبل
ربيع: وباهي انشالله ماقلتش لحد
غيري ؟
عجاج (بخبث طبعا يكذب يترجل الي
جانب الخشبة )
عجاج: اا الحقيقة هذا سر زرق مني
لك (وهو يدير ظهره ويومئ بعينة للخلف يعني يحاول خداع ربيع )
ربيع: (يحاول التلطف لعجاج ) ن2ااا خويا عجاج نحن واحد
عجاج (كطفل زعلان ) : ااا نحنا واحد
ربيع : شنو رايك انديروا حملة كبيرة عشان ننتخبوك انت ، وانا نصرف ع الحملة
وانجيبلك قنوات ونعقدلك موتمرات ؟
عجاج (كما اهبل ) : اا سمحة ونطلع في التلفزيون ؟
ربيع: تي تطلع ف التلفزون والجرايد وصورك في الشوارع ،تي علي اليمين انحطلك صورك علي ماللية برشلونة في مباردة الدربي
عجاج : ونسجل قول ع الريال ؟
ربيع: تي اللاعب هو اللي يسجل
عجاج: ماهو انا راكب امعاه ف
الماليا
(يتخيل
انه يسجل هدف وصوت جمهور وبؤره علية وبؤرة
اخرى على ربيع ويحلم بالفلوس ويعدها )
( تتراقص
اضواء ويتحول المكان الى مهرجان انتخابي )
عجاج : سوف انوفر لكم الميه ، ان2نخليها اتصب ليل نهار،، عادي سيقوا اغسلو فرش امية لاقوة إلا بالله (
الحضور دمى وربيع يشجع علي اساس مؤيد له يصفق ويحث الجمهور الدمى على التصفيق
عجاج : والضي توا انخليه يفقهر ليل نهار، لين ما اترقدو بلك من قوة الضي ،ماعش تعرفو الليل م
النهار (تترقص اضواء ويشير لهم بعلامة النصر وتصفيق
عجاج : سوف اجعل الامن (يحاول نطقها) مس مس مسترب ،ااا ، اللي يخطفو ماعاش
يخطفو سوف اجعلهم ايود كم للحوش ،يخطفك لكن ايودي الحوشكم اااا،، ،ليش ؟ لاني سأحتوي
هواية الخطف عندهم وانحولها الي هواية
ايجابية، يخطف لكن يرد بـيك ع الحوش ،اااا
، وانت عاد خليك ذوق وعطية حق التوصيلة شي الفين ثلاث
عجاج : ســـــوف انوفرلكم السيولة ،اااا ، انخلي الرواشن امتاعات المصرف امسكرات ا ااا، ،، لاجل السيولة ورق خفيف
، اللي سببت ازمة السيولة هي الرياح القوية ،طيرت السيولة م المصارف اأأ، ا سكروا
الرواشن، سكر ،سكر، انديروا حملة وطنية ،عنوانها
سكر روشن تكسب حوشن ،يعني تقدر اطلع قرض
حوش ،
عجاج: ســــــــوف انوفر الخبزة ،موش ساخة وبقرشين بس ،،لا ، انخليها فردة
دوطويلة ودائرية وفيه عدة الوان ،ااا ملونة ،واتحلها تبي اديرها نفص طن والا مفرم ، تلقى هدية جوا امع المحة ااا ،تلقى
تذكرة سفر لجزر المجاري أأأ؟ (يوميء له ربيع)
ربيع :كناري كناري
عجاج : جزر حكاكي
ربيع : خرف رد ع الدكان وحكاكي الفول
عجاج: ســوف اجعل الصحة عالمية، لين الواحد يتمنى يمرض بيش يدهور ف هالمستشفيات
اللي اتقول فنادق ، انخليهن ملينات أدوية احبوب
اشروب كوتيل،أومعدات جراحة وتصوير وخلاطات
وست البيت ودكتاترة متوفرين كل بين دكتور ودكتور دكتور، الصحة اتجك لعندك في سيارة مجهزة اااا، حتى سيارة لاسعاف انخلي دكتور يسوقها اا ما عش
فيه ازمة دكاترة بوكل
عجاج: ســـــوف انخليلكم التعليم تفاعلي ،(ينظر لربيع
وربيع يحاول ان يشرح له بصوت خفيض دون جدوى )
عجاج : اا، تفاعلي اتفعل في المعمل كلها الكيميا امع الفيزيا اا،، خليو
لعويلا يقرشو ا،،ااا ،، أيـتـفاعلوا اا
عجاج : سوف انخلي الدولار ت كيف الخبزة البايتة عادي ، كان مش ساخن توا م
المصرف ،، سيبا عملة يابسة للسعي ، خطرها
السعي العلفة حديثة ، انخلي الحولي الوطني يعتز ابنفسة ومعش ياكل خبزة يابسة
، ما ياكل الا علفة مغطاة بالشكولاطة ومحشية
فسدق ااا
(تتدفق
موسيقي احلام ثم مأساة ويستمر عجاج تتحرك شفتاه
ويداه بينما الموسيقى ترتفع ثم تعود لمشهد الواقع بقفلة )
ربيع ( يتحول الي صاحب كوشة ينادي واحد متأخر علي دورة في الخبزة )
ربيع: (في ثوب خباز)
ربيع: المن الشكارة هذي ؟ ياهو لمن اشكار هذي ؟
عجاج: انعم انعم شوري (ويركض الي
المخبز على يسار الخشبة )
عجاج: ينظر للجمهور ويقول وين
اوصلنا ؟
ربيع: ( بلباس الخباز ، يرد علية مقتربا منه )
ربيع : انت من بدري تحكي والزبائن كلهم خذو خبزتهم وعدو ، هاك الباقي
عجاج: ينظر لكيس الخبز يترك الباقي
، يقبل رغيف الخبز، ويمرر يدة في يد ربيع ممسكين بيدهم كما اطفال فرحين ويتقفازان
ويغادران فرحان بانجاز الخبز) مع موسيقى تتماشي مع الحاله ، عودة للمشهد الاول من المسرحية ونفس الموسيقى
في البداية )
انتهت
